Rreth 200 minuta ka qenë dëshmia e vajzës 13 vjeçare nga Kavaja në kuadër të hetimeve për përdhunimin e saj nga 8 djem adoleshentë. Sipas burimeve, e mitura ka dhenë të njëjtën dëshmi si parë.
Vajza 13-vjeçare, e cila u përdhunua nga 8 adoleshentë në Kavajë ka dëshmuar të shtunën për rreth 3 orë në Gjykatën e Durrësit, në kuadër të hetimeve të nisura për këtë çështje. Burimet bëjnë me dije se e mitura i ka qëndruar dëshmisë së dhënë më parë për prokurorët, mbi bazë të të cilave 7 nga 8 të akuzuarit ndodhen në burg.
Sipas dëshmisë së saj, stafi pedagogjik ishte në dijeni të abuzimit ditë më parë, por nuk e kanë denoncuar në strukturat e tjera shtetërore.
Dëshmia e vajzës do të përdoret si provë në procesin ndaj 8 të akuzuarve, apo personave të tjerë që mund të rezultojnë të implikuar në krimin tronditës.
Ndërkohë Prokuroria e Durrësit ka nisur hetimin për drejtorinë arsimore dhe drejtuesit e shkollës, pasi nuk kanë referuar rastin në prokurori.
Vajza bashkë me prindërit trokiti në dyert e policisë, më 29 janar, pasi ishte abuzuar nga një grup djemsh që e shantazhonin me një video intime.
Denoncimi kaloi në prokurorinë e Durrësit ku ka një seksion të çështjeve për të mitur. Më datë 30 prokuroria regjistroi procedimin penal. Ndërsa, më 1 shkurt gjykata caktoi masat dhe me 2 shkurt u bë i mundur arrestimi i 7 prej tyre ndërsa i teti i dashuri i vajzës është ende në kërkim.
