Në fshatin Senicë, të njohur si “ballkon” i krahinës së Rrëzomës, 254 vite më parë u mbajt një kuvend me përmasa panjugore, që ka hyrë në histori si Kuvendi i Besës.
Kjo ngjarje historike dhe mesazhet që vijnë nga historia për të sotmen, ka mbledhur sërish këtë prill seniciotët, bashkëkrahinorët e tyre dhe miq nga treva të ndryshme të jugut.. Eventi u hap nga kryetari I fshatit zoti llambi nika.
Në Kodrën e Kuvendit të Burrave, Kryetari i Shoqatës, Albert Jorgji nënvizoi se mbajtja gjallë e trashëgimisë së vyer, në funksion të rritjes së dashurisë për vendlindjen, është parësore për “Besëlidhjen e Vëllazërisë Seniciote”.
Në evokim të Kuvendit të Besës, u mbajtën disa kumtesa. Kostaq Xuxi tregoi ndër të tjera, për dy kamaret e Kodrës së Senicës, ku më 1770 u vendosën Kurani dhe Bibla, si simbol i bashkimit pa dallim feje, kundër sundimit osman.
Murat Keraj nga Zhulati foli për Kuvendet e Senicës dhe Taroninës, si Kuvende të ligjvënies dhe bashkëjetesës. Krijuesja Urani Nika foli për krijimtarinë që është trashëguar nga pasqyrimi i kësaj ngjarjeje.
Ndërsa gazetari Thoma Nika tregoi për ritet dhe doket që janë frymëzuar nga Kuvendi i Besës seniciote. Eventin e Senicës e përshëndeti edhe Asim Canaj, Kryetar i Shoqatës “Labëria” për Sarandën, si dhe Vladimir Kumi, përfaqësues i Bregdetit dhe biznesmeni Shpëtim Ahmeti, .
Dritë të re për Kuvendet e Jugut hodhi studjuesi Jupe Gavoi, ndërsa Kapo Gjoça, kryetar i fshatit Zhulat, shprehu vlerësim që trashëgimia e ardhur nga Besëlidhja e Senicës, transmetohet në shekuj e në breza.
Familja e tre muzikantëve Xuxi, Kostaqi, Genti dhe Martini, i ardhur enkas nga Londra, , performuan për të pranishmit në violinë dhe fizarmonikë. Grupi “Besëlidhja” i Senicës, si dhe ai i Fushëbardhës e Delvinës, transmetuan mesazhet historike të Kuvendit të Besës, përmes polifonisë.
