Në fshatin Rrajcë të bashkisë së Përrenjasit ka përfunduar asfaltimi i Unazës në një gjatësi prej 5 km, duke e shndërruar këtë zonë në një lagje të qytetit. Kryetari i bashkisë së Përrenjasit, Nuri Belba i shoqëruar nga kryetari i Grupit Parlamentar të Partisë Socialiste Taulant Balla inspektuam përfundimin e asfaltimin e këtij investimi.
“Investimi në këtë rrugë me një gjatësi 5 km, rreth e rrotull fshatit Rrajcë e shndërroi këtë zonë në një lagje të qytetit. Si një nga fshatrat më të mëdhenj të Përrenjasit, Rrajca e kishte të domosdoshëm këtë investim, i cili u bë i mundur nga qeveria shqiptare përmes Fondit Shqiptar të Zhvillimit dhe nën kujdesin e veçantë të Taulant Balla, pasi rruga e mëparshme po shkonte drejt shkatërrimit të plotë”, thotë kryetari i bashkisë së Përrenjasit.
Sipas tij, finalizimi i këtij projekti të rëndësishëm i ka dhënë zgjidhje një problematike të shfaqur prej kohësh. “Falë bashkëpunimit me Fondin Shqiptar të Zhvillimit ne arritëm t’u japim banorëve të Rrajcës një rrugë me parametra bashkëkohore, duke përfshirë sinjalistikën e nevojshme, duke përfshirë edhe aparaturat për zjarrëfikset në raste zjarri.
Investimet nga Qeveria Shqiptare në këtë fshat nuk kanë munguar. Këtë vit kemi shumë projekte që po finalizohen, por edhe të tjera që janë në vazhdim”. Belba ka lajmëruar se së shpejti përfundon edhe investimi në ujësjellësin Gurrat e Zeza.
