TIRANË, 8 tetor /ATSH/ Lehtësi dhe akses për më shumë shërbime, për personat me aftësi të kufizuar, është impakti i programit “Askush të mos mbetet pas/Leave No One Behind (LNB)” që po zbaton qeveria shqiptare në bashkëpunim me projektin e OKB, aktualisht në tri bashki të vendit: Lezhë, Pogradec e Përmet.
U prezantuan në një takim online dokumentet finale të Planeve Vendore të Aksesueshmërisë që bashkitë e Lezhes, Pogradecit dhe Përmetit, kanë përgatitur si pjesë e nismës për nxitjen e aksesueshmërisë për personat me aftësi të kufizuara që ka ndërmarrë Ministria e Shëndetësisë dhe Mbrojtjes Sociale në nivel qendror dhe vendor, me mbështetjen e PNUD, përmes Programit “Askush të mos mbetet pas/Leave No One Behind (LNB)” duke synuar të luftojë përjashtimin social, pabarazitë dhe diskriminimin, dhe t’u mundësojë të gjithëve akses në të drejta, shërbime dhe mundësi.
Në takimin e sotëm të drejtuar nga zëvendësministrja e Shëndetësisë dhe Mbrojtjes Sociale, Bardhylka Kospiri, morën pjesë përfaqësues nga vetë grupi i interest, tri bashkitë dhe programi LNB, të cilët diskutuan mbi hapat konkretë që këto bashki do të ndërmarrin në drejtim të zbatimit të tyre.
Në të treja bashkitë, Planet Vendore të Aksesueshmërisë janë fokusuar në realizimin e të drejtës për aksesueshmërinë në mjedise, transport, informacion e komunikim për personat me aftësi të kufizuara si parakusht për gjithëpërfshirje.
Duke mbështetur përpilimin e Planeve Lokale te Aksesueshmërisë, Programi i Përbashkët i Kombeve të Bashkuara ‘Askush të mos mbetet pas’ që financohet nga Qeveria zvicerane, synon që politikat kombëtare të përkthehen në aksione konkrete për njerëzit afër vendbanimit, që bashkitë të parashikojnë masa dhe buxhete në përmbushje të nevojave të personave me aftësi të kufizuara dhe që vetë grupi i interesit të marrë pjesë në zhvillimin, zbatimin dhe monitorimin e këtyre planeve lokale.
