Disa të shtëna me armë zjarri janë regjistruar mbrëmjen e sotme në Mat, në fshatin Bushkash.
Burimet bëjnë të ditur se, Xhovalin Rica, kryetari i Grupseksionit të PD në Ulëz është plagosur me armë në oborrin e shtëpisë së tij.
Policia manipulon rrethanat e ngjarjes dhe e servir lajmin për mediat si vetëplagosje.
Burimet nga vendi i ngjarjes bëjnë të ditur se Rica ka qenë në oborrin e shtëpisë së tij kur është qëlluar me çifte nga një person dhe ka mbetur i plagosur rëndë.
Të njëjtat burime bëjnë të ditur se Xhovalin Rica ka qenë në një lokal me një person sot në mesditë dhe kanë bërë debate. Dyshohet se personi që ka qenë në lokal me Ricën mund ta ketë qëlluar me çifte. Policia e njeh personin që qëlloi me armë ndaj kreut të PD-së Ulzës, por e ka lënë të lirë duke e cilësuar krimin si vetëplagosje.
I plagosuri Rica është nisur drejt Spitalit të Traumës në Tiranë.
Njoftimi i Policisë së Matit
Policia ka marrë informacion se në fshatin Bushkash, Mat, dyshohet se është vetëplagosur me armë gjahu shtetasi Gj. R., 45 vjeç, pranë banesës së tij. Menjëherë është ngritur grupi hetimor duke shkuar në vendin e ngjarjes, ku paraprakisht i dëmtuari ka deklaruar se është vetëplagosur me armën e gjahut. Shtetasi Gj. R., është dërguar për ndihmë më të specializuar drejt Tiranës. Grupi hetimor vijon hetimet për sekuestrimin e çdo prove materiale që do të çonte në zbardhjen e plotë të rrethanave të ngjarjes.
