Një ngjarje e paprecedentë ka ndodhur në Qendrën Spitalore “Nënë Tereza” (QSUT), ku tre infermierë të Neurokirurgjisë u pezulluan pasi gjatë kontrollit në orarin e punës u kapën duke ngrënë molto.
Atyre iu është komunikuar që do të jenë të pezulluar deri në muajin korrik. Në lidhje me këtë ngjarje të pazakontë ka reaguar Elson Jaçaj, drejtues i Shoqatës së Infermierëve. Ai tha se për shumë qytetarë mund të duket e pabesueshme, por sipas tij trajtimi i personelit në QSUT nuk është ai i duhuri dhe ai që reklamohet nga qeveria. Jaçaj shtoi se ngjarja është mbajtur e fshehtë, ka disa ditë që ka ndodhur dhe i është bërë presion personelit për të mos treguar të vërtetën.
Ai shprehet: Një grup kontrolli që ka shkuar në një nga pavionet e QSUT dhe ka gjetur infermierët duke konsumuar ushqim (molto). Në QSUT infermierët punojnë pa protokoll, por në kodin e punës çdo punonjës ka nevojë që të konsumojë diçka gjatë ushtrimit të profesionit. Aty punohet pa protokolle dhe nuk zbatohet asnjë ligj për infermierët. Një infermier i vetëm që i shërben 20 pacientëve a nuk do të ketë nevojë për 5 min pushim?
