17 raste të reja janë shënuar në vendin tonë në 24 orët e fundit, duke e çuar numrin total të të prekurve në 820. Drejtoresha e ISHP-së Albana Fico deklaroi sot se ajo që është shqetësuese është se në 24 orët e fundit ka një rritje të lehtë jo vetëm të rasteve pozitive, por edhe atyre që kërkojnë shtrim në spital. 4 pacientë i janë shtuar spitaleve Covid në 24 orët e fundit, një prej rasteve ka përfunduar në terapi intesive.
Sipas Ficos, 11 nga rastet e reja që janë zbuluar së fundi janë raste familjare dhe persona kontaktesh, ndërsa 6 raste të tjera janë raste të reja, çka shton mundësinë e rritjes së mëtejshme të numrit të të prekurve pas hetimit epidemiologjik. Deklarata: Situata epidemiologjike po monitorohet me shumë kujdes nga të gjitha strukturat e shëndetësisë. Në këtë situatë të lehtësimit të masave, është rritur vigjilenca për gjurmimin, testimin dhe identifikimin në kohë të rasteve të dyshuara si dhe kontakteve të tyre. Gjatë 24 orëve të fundit janë kryer 270 testime për persona të dyshuar dhe prej tyre rezultojnë 17 raste pozitive.
11 të prekur janë kontakte të rasteve të mëparshme pozitivë, ndërsa për 6 të prekur po vijon hetimi epidemiologjik në terren. Rastet pozitive të ditës së sotme janë të shpërndara përkatësisht, 9 raste në Tiranë, 5 raste në Krujë dhe Kamza me 3 raste, vatër familjare. Që nga fillimi i epidemisë deri më sot janë konfirmuar pozitivë me COVID-19 në të gjithë vendin 820 qytetarë ndërsa 70 % e tyre janë shëruar. Aktualisht janë 219 persona aktivë me COVID19. Siç shihet, ka një rritje të rasteve në 24 orët e fundit, jo vetëm në numrin e rasteve të identifikuara por edhe shtrimet në spital janë shtuar. Në dy spitalet, sot kemi 38 të shtruar nga të cilët 8 janë në terapi intensive.
Ministria e Shëndetësisë dhe Mbrojtjes Sociale apelon për qytetarët që të vazhdojnë të respektojnë distancimin fizik dhe të mbajnë higjienën personale, po ashtu bizneset e hapura të respektojnë me rigorozitet protokollet e sigurisë. Ftojmë qytetarët të mos neglizhojnë shenjat dhe të telefonojnë menjëherë urgjencën kombëtare 127 në rast se kanë dyshime se janë të prekur nga ky virus. Për të kontaktuar mjekun e familjes, për pyetje, për këshillim psikologjik në rast të shfaqjes së shenjave të ankthit apo shqetësime të tjera, ju lutemi, telefononi në linjën e gjelbër 0800 40-40.
