Uniformat blu i kanë ardhur në ndihmë një qytetareje e cila kishte humbur portofolin me një shumë të konsiderueshme parash brenda tij. Gjatë patrullimit, efektivët e Komisariatit të Policisë Nr.2 kanë gjetur portofolin të cilin ia kanë dorëzuar menjëherë qytetares.
“Punonjësit e Komisariatit të Policisë Nr. 2 gjejnë dhe i dorëzojnë një shtetaseje, portofolin që i kishte humbur në rrugë. Shërbimet e Komisariatit të Policisë Nr. 2, gjatë patrullimit në territor, në rrugën “Muhamet Gjollesha”, kanë gjetur në tokë, një portofol me një shumë parash, karta bankare dhe dokumente identifikimi të një shtetaseje.
Punonjësit e Policisë e kanë dorëzuar portofolin, në Komisariatin e Policisë Nr. 2, dhe pas verifikimeve të kryera është kontaktuar me shtetasen të cilës i kishte humbur portofoli. Kjo shtetase është paraqitur në komisariat dhe ka falënderuar punonjësit e Policisë, për gjestin dhe korrektësinë e treguar.”, thuhet në njoftim.
