Katër shqiptarë kanë rënë në prangat e policisë britanike, nën akuzë për trafikim lëndësh narkotike.
Të arrestuar janë vëllezërit Edmond dhe Eduart Haziri, kushëri ri i tyre Gazmend Hoxha si dhe një shok, Alban Krasniqi.
Ata e kishin nisur “biznesin” e tyre nga një berberhane, duke e shndërruar këtë biznes të vogël, në qendrën e një rrjeti të organizuar trafiku dhe lojërash ilegale bixhozi, ku trafikantët vendosnin baste në mijëra paund, raporton “The Sun”.
Shqiptarët ndihmoheshin nga shpërndarës rumunë dhe fitonin deri në 4000 paundë në ditë me rrjetin që dërgonte drogat në rajone të tjera si Derbyshire, Leicestershire e Staffordshire. Drogat shpërndaheshin për rreth 145 përdorues në ditë, shpesh të mbështjella në bileta llotarie.
Policia ra në gjurmët e tyre, pasi gjurmoi më shumë se 1 milionë mesazhe e komunikime të tyre në platforma si WhatsApp apo telefonata të dyshimta.
Sipas mediave britanike, dy vëllezërit bënin një jetë luksi duke blerë ora Rolex apo veshje mode nga firma si Alexander McQueen, Louis Vuitton e Moncler, shkruan The Sun. Edmondi, 36 vjeçar, mbante në qafë një zinxhir floriri me diamante 30 karat.
Oficerët thanë se e dinin që vëllezërit ishin lojtarë seriozë në tregun e drogave por nuk e dinin që kishin dhe një kazino ilegale.
Prindërit e vëllezërve punojnë rregullisht në një restorant dhe nuk morën akuza
