Në qarkun e Vlorës vijon shpërndarja e pensioneve në banesë për të moshuarit. Prefekti i qarkut Vlorë, Flamur Mamaj, tha për ATSH-në se “ditën e djeshme filiali i Postës Vlorë dhe ai i Sarandës kanë shpërndarë në banesë 104 pensione”. “Konkretisht janë shpërndarë 73 pensione në Vlorë, 28 në Sarandë dhe 3 në Delvinë”, – tha Mamaj.
Prefekti Mamaj u shpreh se “po ashtu filiali i postës Vlorë ka shpërndarë ndihmën ekonomike dhe pagën e invaliditetit, ku në Vlorë janë dërguar në banesë 183 pagesa të ndihmës ekonomike dhe në Selenicë 10”.
Posta Shqiptare vazhdon intensivisht shpërndarjen e pensioneve në banesë për të gjithë pensionistët e Republikës së Shqipërisë. Në kuadër të situatës së krijuar prej COVID-19, qeveria mori masat që pensionistët dhe të moshuarit të mos lëviznin prej banesave të tyre, duke dërguar edhe pagesat e pensioneve pranë banesave të tyre.
