Presidenti Ilir Meta ka pritur sot në takim zv/presidentin e rajonit të Siçilisë Gaetano Armao dhe deputeten e Parlamentit të Italisë, Giusi Bartolozzi.
Meta shprehet se kanë ndarë të njëjtin qëndrim për forcimin në të gjitha fushat, të marrëdhënieve tradicionale mes vendit tonë dhe Italisë.
Ai shprehet se ka dëgjuar prej tyre vlerësimet më të larta për bashkëjetesën shekullore me Komunitetin tonë Arbëresh.
“Mirëprita sot përzemërsisht Zëvendëspresidentin e Rajonit të Siçilisë, Gaetano Armao dhe deputeten e Parlamentit të Italisë, Giusi Bartolozzi.
Në bisedën e frytshme gjetëm mirëkuptimin e plotë për domosdoshmërinë e vendosjes sa më parë të një bashkëpunimi të veçantë mes Shqipërisë dhe Siçilisë, sipas modelit të ndjekur me Rajonin e Puljas.
Ndamë të njëjtin qëndrim mbi rëndësinë e forcimit të mëtejshëm, në të gjitha fushat, të marrëdhënieve tradicionale të shkëlqyera mes vendit tonë dhe Italisë.
I lumtur të dëgjoja prej tyre vlerësimet më të larta për bashkëjetesën shekullore me Komunitetin tonë të dashur Arbëresh, pjesë edhe e identitetit historik e kulturor të Siçilisë, që së bashku me komunitetin e ri të shqiptarëve në këtë Rajon përbëjnë një urë të rëndësishme për forcimin e mëtejshëm të marrëdhënieve mes dy vendeve dhe popujve tanë’, shkruan Meta.
