Një apartament me vlerë 270 mijë euro është sekuestruar në Tiranë me vendim të Prokurorisë së Lushnjës. Referuar njoftimit zyrtar, bëhet me dije se pasuria e paluajtshme është në pronësi të një 32 vjeçari Marsel Korreshi, banues në Lushnje.
Ky shtetas rezulton sipas Policisë, i dënuar për veprën penale “Prodhimi dhe shitja e lëndëve narkotike” dhe paratë e përfituara nga ky aktivitet i ka përdorur për të blerë apartamentin në kryeqytet. Gjykata ka pranuar kërkesën e organit të akuzës dhe Policisë, duke lejuar vendosjen e sekuestros.
“Nga specialistët e seksionit për Hetimin e Krimeve Ekonomiko-Financiare të Drejtorisë Vendore të Policisë Fier, në bashkëpunim me Prokurorinë pranë Gjykatës së Rrethit Gjyqësor Lushnjë, u bë ekzekutimi i vendimit të Gjykatës së Rrethit Gjyqësor Lushnjë, i datës 03.10.2022, për vendosjen e sekuestros preventive ndaj pasurisë së shtetasit Marsel Korreshi, 32 vjeç, banues në Lushnjë, i dënuar më parë, për veprën penale “Prodhimi dhe shitja e lëndëve narkotike”.
Nga veprimet hetimore rezulton se pasuria e 32-vjeçarit ka si burim veprimtari kriminale. Në zbatim të vendimit të Gjykatës u bë sekuestrimi i një pasurie të paluajtshme (apartament në Tiranë), me vlerë 270 000 euro”, njofton Policia e Shtetit.
Vijojnë hetimet dhe verifikimet për evidentimin e pasurive të tjera që mund të jenë në emër të këtij shtetasi dhe të personave të lidhur me të.
