Një fotografi po bën xhiron e botës, duke shkaktuar dhimbje të madhe dhe zemëratë. Bëhet fjalë për disa çadra të hapura, të vendosura në dysheme, bashkë me disa kuti përreth, për të mbuluar trupin e pajetë të një punonjësi të një supermarketi, i cili pësoi infarkt në punë. Në pritje të ardhjes së policisë dhe shërbimeve funerale, përgjegjësit e supermarketit vendosën që ta mbulojnë kufomën, në mënyrë që të mos ndërpritej puna.
Skena e rëndë vjen nga Recife, në Brazil, ku viktima është Moisés Santos, një punonjës i rrjetit të supermarketeve Carrefour. Por disa klientë që asistuan skenën filmuan momentet të indinjuar, duke i publikuar në rrjetet sociale.
Kjo bëri që drejtuesit e Carrefour në Brazil të dalin me deklaratë duke e dënuar ngjarjen, “Kërkojmë ndjesë për mënyrën e papërshtatshme se si u trajtua një tragjedi e trishtë, ku humbi jetën papritur punonjësi ynë Moisés Santos. Mbajtja e marketit hapur, në vend të mbylljes së menjëhershme, ishte një gabim i madh”.
