Presidenti rus Vladimir Putin ka urdhëruar ushtrinë e tij të anulojë planet për të sulmuar fabrikën Azovstal në qytetin port të rrethuar ukrainas të Mariupolit.
Gjatë një daljeje televizive, ku ishte ulur përballë ministrit të tij të Mbrojtjes Sergei Shoigu, Putin tha se nuk ishte e nevojshme që forcat ruse të ngjiteshin në ato katakomba dhe të zvarriteshin përgjatë objektit industrial për të marrë nën kontroll fabrikën.
Në vend të kësaj, ai u bëri thirrje forcave të tij që të “bllokojnë këtë zonë industriale në mënyrë që as një “mizë të mos kalojë”.
Putin gjithashtu përshëndeti “çlirimin” e Mariupolit nga Rusia pasi ministri i Mbrojtjes Sergei Shoigu i tha atij se forcat ruse tani kontrollojnë qytetin port të Ukrainës, përveç uzinës.
Ministri siguroi se edhe fabrika duhet të merret për tre deri në katër ditë.
Askush nuk është larguar nga fabrika përmes korridoreve humanitare të ofruara, tha ministri.
Më herët, pala ukrainase kishte propozuar negociata për fatin e luftëtarëve dhe shpëtimin e civilëve që kishin kërkuar strehim në fabrikë.
Qyteti port juglindor i Mariupolit ka përjetuar luftimet më të ashpra që nga 24 shkurti, ndërsa forcat ruse përpiqen të marrin kontrollin e plotë. Kapja e tij do të ishte një çmim i madh strategjik dhe do të lidhte territorin e mbajtur nga separatistët pro-rusë në lindje me rajonin e Krimesë që Moska aneksoi më 2014.
Presidenti Volodymyr Zelenskiy ka thënë se rreth 1000 civilë janë strehuar në fabrikën e çelikut.
Kievi ka propozuar shkëmbimin e të burgosurve rusë të luftës për kalim të sigurt për civilët dhe ushtarët e bllokuar. Nuk dihej nëse Rusia i ishte përgjigjur ofertës për negociata speciale.
Luftëtarët mbeten të ngujuar në uzinë dhe kanë injoruar një ultimatum nga Rusia për t’u dorëzuar.
Rusia e quan sulmin ndaj Ukrainës një “operacion special ushtarak” për të çmilitarizuar dhe “denazifikuar” Ukrainën. Kievi dhe aleatët e tij perëndimorë e refuzojnë këtë si një pretekst të rremë për luftë.
Perëndimi ka vendosur sanksione të paprecedentë ndaj Rusisë dhe i ka dhënë Ukrainës mbështetje të gjerë, duke përfshirë armë.
