Një ditë pas arritjes së marrëveshjes për formimin e qeverisë së re në Maqedoninë e Veriut mëes Ali Ahmetit dhe Zoran Zaev, ka reaguar Presidenti i Shqipërisë, Ilir Meta.
Kreu i Shtetit vlerëson këtë vendim për të formuar një qeveri me bazë të gjerë edhe të përfaqësimit shqiptar, ku ndër dikasterët më të rëndësishme që do të drejtojnë janë Ministria e Jashtme, Kryetari i Parlamentit dhe 100 ditët e fundit të qeverisë që do të udhëhiqen nga një përfaqës shqiptar në postin e kryeministrit.
Siopas Metës kjo marrëveshje është një tjetër hap pozitiv për forcimin e institucioneve demokratike dhe përparimin e reformave, teksa thekson zgjedhjet demokratike që u zhvilluan në vendin fqinj, ka edhe një mesazh e kërkesë të fortë për aktorët politik në vendin tonë.
Reagimi i plotë: Finalizimi i marrëveshjes për formimin e Qeverisë së re në Maqedoninë e Veriut është një tjetër hap pozitiv për forcimin e institucioneve demokratike dhe përparimin e reformave.
Rritja e përfaqësimit të faktorit shqiptar në qeverisje, përfshirë dhe mundësinë e Kryeministrit shqiptar në të ardhmen, është tregues europianizues dhe vitalizues për forcimin e bashkëjetesës.
Pas zgjedhjeve demokratike dhe konkurruese, fqinji ynë ecën me siguri të merituar për çeljen e negociatave me Bashkimin Europian.
Duhet të mësojmë prej tyre dhe të kthehemi në shina sa më parë, duke nisur me respektimin e Marrëveshjes së 5 qershorit dhe plotësimin e gjithë kushteve të tjera. 🇦🇱🤝🇲🇰
