Zëvendësministrja e Shëndetësisë dhe e Mbrojtjes Sociale, Mira Rakacolli deklaroi sot se “Urgjenca Kombëtare ka pësuar një ndryshim rrënjësor dhe në numrin 127 apo 112 mund të telefonojë e gjithë Shqipëria”.
Gjatë një interviste televizive, Rakacolli tha se “tashmë personeli i ambulancave është një personal i trajnuar mirë dhe vetë flota e ambulancave është pajisur me automjete të reja në përputhje me standardet më të larta të Bashkimit Europian”.
Sot, një risi e shërbimit të urgjencës është dhe helikopteri, i cili sipas zv/ministres, ngrihet shumë më shpesh. “Nëse më përpara që të vinte të asistonte helikopteri duhet të kishe diçka vërtetë serioze, tani po bëhen gati 260 misione për këtë viti, pra gati një në ditë. Helikopteri është në çdo moment në dispozicion për tu ngritur, kur nga ekipi i urgjencës gjykohet se rasti duhet asistuar me mision ajror”, – thekson zv/ministrja Rakacolli.
Duke folur për kontrollin bazë mjekësor, Rakacolli tha se “koncepti i check up ose kujdesit mjekësorë bazë është bashkëkohor sepse në radhë të parë është një mjet për t’u kujdesur si duhet për pacientët. Në gjithë botën politikat shëndetësore po drejtohen tek parandalimi. Shumë njerëz vuajnë nga depresionet dhe këto sëmundje përbëjnë barrën kryesore të sëmundjeve shëndetësore. Lajmi i mirë është që këto sëmundje mund të parandalohen e që të parandalohen duhet të njihen nëpërmjet analizave, a kemi yndyrna, a kemi diabet a kemi të dhëna për sëmundje malinje dhe janë të gjithë analizat që ofrohen në check up që e ofrojnë këtë gjë”.
Referuar statistikave, vitin e kaluar e kanë bërë checkup-in rreth 400 mijë qytetarë ndërkohë që sipas ministres, vetëm gjatë 9 muajve të këtij viti, janë bërë më shumë se 400 mijë kontrolle.
E pyetur rreth vaksinës anti-grip, e cila u anonçua sot se do të fillojë të shpërndahet në komunitet, Rakacolli tha se, “javën tjetër do fillojmë me vaksinimin anti-grip, me personalin mjekësor si fillim sepse ai është më i prekuri, më i predispozuari për të marrë gripin, pastaj me grupet më vulnerable të komunitetit”.
Sa i përket sistemit të shëndetësisë në Shqipëri, zv/ministrja thotë se “objektivat janë të qarta. Ne duhet të ecim përpara sepse ka vërtetë shuam gjëra për t’u bërë. E rëndësishme është që janë vënë themelet mirë dhe pastaj çdo gur që vihet e ngre ndërtesën”.
Në fund, Rakacolli u ndal edhe tek largimet e mjekëve nga Shqipëria ku tha se, “vetëm në vitin e fundit janë licencuar 88 mjekë të huaj për të punuar në Shqipëri, kanë ardhur 8 studentë që kanë mbaruar jashtë mjekësinë”.
