Kryeministri Edi Rama i pyetur nga gazetarët në lidhje me legalizimin e kanabisit tha se nuk ka hequr dorë nga kjo ide, por do të ketë kohë. Po ashtu Rama tha se do të jetë në pushtet deri në vitin 2025. “Legalizimi i kanabisit do ta bëjmë kur të jetë gati. Kur të jetë gati njësoj si amnistia fiksale pasi është i lidhur me konsultime për ekspertize ndërkombëtare . Të paktën këtu më keni edhe për 5 vjet. 2025-2029 flasim.”- tha Rama. Në fund të një takimi të gjatë me gazetarët, Edi Rama ka komentuar edhe vendimin për hapjen e kazinove në qendër të Tiranës, që sipas tij është fryrë prej mediave, pasi ligji e parashikon caktimin e një zonë strategjike.
Rama tha se në ligj thuhet qartë se kazinotë lejohen në hotelet me 5 yje, dhe në ato vende strategjike ku caktohen nga vetë qeveria. “Kjo është komplet gënjeshtër, nuk ka asnjë lëshim dore për të dhënë licensa për kazino apo për bixhoz. Është hapur vetëm një procedurë specifike, e cila lidhet me përfundimin e afatit të të vetmes kazino që ka qenë prej shumë vitesh në qendër të Tiranës. Dhe duke pritur që dikush tjetër të ofertojë, jo se janë hapur në atë rrugë, kazinotë hapen vetëm në struktura me 5 yje,apo në zona strategjike për turistët, gjë që nuk e kemi ushtruar masivisht. Në hotelet me 5 yje po, 5 yje me brande, jo me pikturat e mia, si psh t’ia vë emrin unë Ezali (Edi, Zaho, Linda)”, u shpreh Rama. Rama u ndal sot kryesisht në procesin e Rindërtimit, që sipas tij po bëhej më shpejt se çdo qeveri që do të kishte qenë në vendin e tij. Me humor kreu i qeverisë tha se do të jetë të paktën edhe 5 vite në pushtet, ndërsa i quajti kundërshtarët e tij, bostan të provuar, që nuk mund ti shiten publikut si të pafajshëm.
