Kryeministri i Shqipërisë, Edi Rama, do të takohet gjatë ditës së sotme edhe me kryetarin e Lëvizjes Vetëvendosje, Albin Kurtin. Këtë e ka konfirmuar për Telegrafin, zëdhënësi i Lëvizjes Vetëvendosje, Përparim Kryeziu. “Takimi do të mbahet në ora 17:00, në zyrat e Lëvizjes Vetëvendosje”, tha Kryeziu për Telegrafin.
Deri më tani të vetmit që e kanë konfirmuar takimin me kryeministrin Rama janë kryetarja e Kuvendit të Kosovës, Vjosa Osmani dhe lideri i LVV-së, Albin Kurti. Ndryshe është raportuar se Shefi i qeverisë shqiptare do të ketë sot dhe të martën takime me krerë të shtetit dhe politikës në Kosovë.
Ai do të takohet me presidentin Hashim Thaçi, me kryeministrin Avdullah Hoti, me kryeparlamentaren Vjosa Osmani, me kryetarin e PDK-së, Kadri Veseli me kryetarin e Nismës, Fatmir Limaj.Takimi me kryeparlamentaren është konfirmuar edhe nga Zyra për media e Kuvendit të Kosovës dhe do të mbahet në ora 15:00.
Vizita e Ramës vjen në një moment delikat për Kosovën pas aktakuzave të ngritura nga Zyra e Prokurorisë Speciale me seli në Hagë ndaj presidentit Hashim Thaçi, kreut të PDK-së, Kadri Veseli dhe disa të tjerëve për krime luftë dhe krime kundër njerëzimit.
Presidenti Thaçi ka lajmëruar sonte në orën 20:00 një fjalim drejtuar qytetarëve të Kosovës. Njoftimi i aktakuzave erdhi tre ditë para takimit të shumëpritur në Uashington ku pritej rinisja e dialogut Kosovë-Serbi, çka çoi edhe në shtyrjen për një moment tjetër.
