Nga Pogradeci, kryeministri Rama u shpreh se vendi është gati që të hapë 4 aeroporte dhe 4 porte për të sjellë turistë në vend nga e gjitha bota. Sipas Ramës, do të ndërtohet një terminali ri e do të zgjerohet pista në aeroportin Rinasit, që shqiptarët të shkojnë dhe të vijnë nga New York drejtpërdrejt në Tiranë.
Rama: Ju e keni dëgjuar se ne jemi gati t’i hapim Shqipërisë katër porta nga qielli, katër nga deti për të sjellë udhëtarë dhe turistë nga mbarë bota për tu kthyer jo vetëm në kampion të Ballkanit në turizëm, por në një vend që hyn në ligën e kampionëve të turizmit. Kjo është ajo që kemi përpara bazuar tek projektet që kemi gati. Ne dje e hapëm aeroportin e Kukësit, për të cilin nuk e besoni.
Sot Shqipëria ka dy aeroporte, por jemi ende në fillim të këtij procesi. Kemi një investim të rëndësishëm për aeroportin e Tiranës, do të ndërtojmë terminalin e ri të zgjerojmë pistën, që shqiptarët të vejnë dhe të vinë nga New York drejtpërdrejt në Tiranë. Brenda pak ditësh nënshkruajmë kontratë për aeroportin e Vlorës dhe do të hapim garën për aeroportin e Sarandës.
Vitet që do të kemi para do të jenë vitet e një transformimi epokal. Shqipëria do të bëhet vendi ku njerëzit nuk duan që të ikin më patjetër. Ne jemi kampion në Ballkan me prodhimin e një sërë produktesh bujqësore. Po ne duhet dhe do të bëhemi kampionë të Ballkanit në Bujqësi kjo është plotësisht e mundur. Kemi ndryshuar raportin e eksportit me importet.
