Prej ditësh vendi i ministrit të Brendshëm ka mbetur bosh dhe duket sikur socialistët i tremben marrjes së posti të tillë, disa muaj përpara zgjedhjeve. Kryeministri Edi Rama në konferencën e fundit për shtyp u shpreh se mos caktimi i ministrit të ri të Brendshëm është çështje teknike. Por, gjatë ditëve të fundit, është thënë se postin e ministrit të Brendshëm, të lënë bosh nga Sandër Lleshi, mund ta marrë edhe një femër.
Në një intervistë televizive, e pyetur nëse do të ishte ajo ministrja e re e Brendshme, Ermonela Felaj u përgjigj: “Do të ishte mirë që zonjat t’i shikonim edhe në postin e ministres së Brendshme, por jo thjesht ideja për të parë një zonjë, por gjithmonë për të vijuar një kauzë që tani gratë edhe vajzat në Shqipëri e kanë marrë përsipër ta kryejnë. E tillë është ajo e promovimit në funksione të rëndësishme, në funksione që shihen si përkatësi vetëm e meshkujve”.
“Por, kjo nuk mund të jetë një qëllim në vetvete i askujt, sepse çdo lloj detyre angazhon një përgjegjësi të caktuar dhe të dhënat e një individi duhen parë në raport me këtë përgjegjësi.Gjithsesi, kushdo që do të promovohet në këtë detyrë, qoftë burrë, apo qoftë grua, unë i uroj suksese në këtë detyrë absolutisht të vështirë”, u shpreh Ermonela Felaj.
