Kryeministri Edi Rama e ka nisur ditën e sotme me një postim kushtuar buxhetit të vitit 2024, ndërsa rikujton se do të rriten pagat për 30 mijë mësues.
Rama e cilëson rritjen domethënëse, e cila do të aplikohet vitin që vjen.
“MIRËMËNGJES dhe me lajmin e mirë se me buxhetin e ri për vitin e ardhshëm do të ketë një rritje domethënëse të pagave për mbi 30 mijë mësues, ju uroj një ditë të mbarë”, shkruan Rama.
Këshilli i Ministrave miratoi në prill vendimin për rritjen e pagave të mësuesve, të cilat vitin e ardhshëm do të jenë nga 23-36% më shumë në varësi të përvojës dhe të gjitha kualifikimeve që ata kanë.
Ish-ministrja e Arsimit, Evis Kushi, deklaronte se paga e një mësuesi të shkollave 9-vjeçare do të jetë 95 550, ndërsa për arsimin e mesëm të lartë do të jetë 106 800 lekë paga bruto. Sipas saj, janë 36 570 mësues në të gjithë Shqipërinë që do të përfitojnë nga kjo rritje e konsiderueshme.
