Kryeministri Edi Rama ka premtuar një rritje të konsiderueshme pagash për të gjithë mjekët dhe infermierët që po përballen me Covid. Në një vizitë në Spitalin Infektiv, i njohur tashmë si spitali Covid-1, Rama deklaroi se duke filluar nga viti 2021, do të ketë një rritje të konsiderueshme pagash për stafet mjekësore që janë në vijën e parë të betejës kundër Covid-19.
“Duam të realizojmë një rritje të konsiderueshme pagash, jo 5 apo 7%. Do bëjmë një rritje pagash të konsiderueshme, ende po kalkulojmë për shumën. Përtej bonuesit 1 mijë euro, që ju si në vijën e parë do t’i merrni deri në fund, do të jeni në një nivel në mesataren e lartë të rajonit. Këtë duam ta bëjmë fakt në fillim të vitit të ardhshëm.
Me të filluar viti të gjithë ju të keni një rritje në pagë. Është një objektiv i detyruar. Ne kemi ndërmarrë masa të caktuara, që të mos i lëmë mjekët të largohen. E vërteta është se largimi ka rënë ndjeshëm. Mesa kemi kuptuar, mjekët qëndrojnë jo nga halli, por shohin si mundësi të arsyeshme ta fillojnë këtu karrierën”, ka deklaruar Rama.
