Kryeministri Edi Rama është takuar në Bruksel me presidentin e Këshillit Europian Donald Tusk, dy ditë nga vendimi për hapjen e negociatave. Rama e ka quajtur Tusk një nga zërat më të fortë në frontin mbështetës për çeljen e negociatave për Shqipërinë dhe Maqedoninë e Veriut.
“Bruksel – Me Presidentin e Këshillit Europian, Donald Tusk, një nga zërat më të fortë në frontin e gjerë të PO-së, për Shqipërinë dhe Maqedoninë e Veriut”, shkruan Rama.
Kreu i qeverisë shqiptare do të takohet me kryeministrat e qeverive socialiste dhe progresiste në Bruksel në një format në funksion të nevojës për të pasur sa më shumë aleatë. Rama thotë se nuk është as pesimist dhe as optimist, por shpreson deri në fund, ndërsa Merkel po përpiqet për të bindur Francën për hapjen e negociatave.
E ndërsa ministrat e Jashtëm nuk ranë dakord për të dalë me një qëndrim unanim për hapjen e negociatave, vendimi final u takon liderëve të BE-së që do të mblidhet nesër dhe pasnesër.
Shqiptarja.com zbuloi sot si u bllokua plani finlandez për të hapur negociatat vetëm me Maqedoninë e Veriut, pasi 12 shtete ishin gati për ta mbështetur. Vendimi u shty për të enjten.
