Raporti i misionit vëzhgues të OSBE-ODIHR këtë herë nuk saktëson nëse 30 qershori plotësoi standardet apo jo. Sipas ish-kreut të KQZ-së, Kristaq Kume, në këtë raport mungon një konstatim i tillë dhe kjo jo pa qëllim.
Gjetjet e raportit të OSBE-ODIHR u interpretuan në mënyra të ndryshme nga palët politike, por për ish-kreun e KQZ-së, Kristaq Kume, raporti nxori në pah mungesën e një proçesi demokratik zgjedhor.
Sipas Kumes, ndryshe nga raportet e mëparshme, kësaj here misioni i OSBE-së nuk ka përcaktuar masën e plotësimit të standardeve.
Kristaq Kume: Ka qenë një proces goxha i distancuar nga plotësimi i standardeve për tu konsideruar një proces normal demokratik. Nuk kam dhënë konsiderata lidhur me masën e plotësimit apo jo të standardeve të ndryshme të parashikuara për zgjedhjet.
Kume theksoi se problematikat janë të ndryshme nga vitet e shkuara, pasi dhe 30 qershori ishte krejt ndryshe nga një proçes zgjedhor normal.
Kristaq Kume: Momentet që kanë të bëjnë me mënyrën e administrimit të procesit zgjedhor nga institucionet përkatëse, KQZ apo Kolegji Zgjedhor. Të dy këto institucione në pjesën më të madhe të vendimmarrjes së tyre nuk i janë referuar ligjit por e kanë kapërcyer ligjin. Ata kanë evidentuar fenomentet në ditën e votimit, siç është votimi familjar. Por kanë evidentuar një femomen ndryshe nga më përpara, siç është votimi me prokurë që do të thotë rasti i votimit të një personi për shumë të tjerë.
Kume nënvizoi se misioni i OSBE-ODIHR nuk mund të çertifikojë apo rrëzojë proçesin zgjedhor.
Ish-kreu i KQZ-së bëri apel që klasa politike të marrë në konsideratë rekomandimet e lëna nga misioni vëzhgues i OSBE-ODIHR dhe më pas të konsiderojnë zhvillimin e zgjedhjeve.
/Ora News
