SHBA-të kanë vendosur një rekord sa i përket infektimeve me Covid. Vetëm në 24 orët e fundit, janë raportuar 77,300 persona të infektuar, sipas të dhënave të John Hopkins University, që raporton shifrat e mbështetura mbi të dhënat e qeverisë. Kjo është shifra më e lartë e regjistruar në botë, gjatë pandemisë së koronavirusit.
SHBA-të kanë qenë të prekura më rëndë nga virusi se çdo vend tjetër i botës, në raport me numrin e infektimeve dhe fataliteteve. Në total janë regjistruar 3,576,221 raste me koronavirus dhe kanë ndërruar jetë, 138,358 persona të tjerë. Pas SHBA-ve, Brazili është vendi me një numër mjaft të lartë infektimesh dhe fatalitetesh, konkretisht me 2,012,151 të prekur dhe 76,688 fatalitete.
Që prej fillimit të pandemisë, Presidenti Trump ka sugjeruar se SHBA-të e kanë menaxhuar mjaft mirë situatën e pandemisë dhe se numri i infektimeve po ulej. Madje më 2 korrik, Trump tha se pandemia “po vendoset nën kontroll”, por shifrat rekord të infektimeve dhe fataliteteve, që vijnë nga SHBA, tregojnë të kundërtën. Që prej fillimit të pandemisë, Trump është shquar për ekzagjërime dhe fakte të pasakte, gjatë komenteve të tij për situatën e shkaktuar nga virusi dhe menaxhimin e saj.