Që prej orëve të para të mëngjesit, policia dhe IKMT ka rinisur sërish puna për shembjen e banesave në zonën e Astirit.
Shembjet janë pjesë e aksionit për punimet në lotin 2 të Unazës së Madhe.
Gazetari i Ora News Besar Bajraktaraj raporton se nuk ka një numër të saktë të objekteve që do të shemben, por puna do të vazhdojë me ritme të shpejta.
Policia ka penguar edhe grupin e xhirimit të Ora News, me pretendimin se po pengon qarkullimin e makinave.
Në zonë ka forca të shumta policie, të cilët kanë vendosur perimetrin e sigurisë, duke penguar edhe banorët të qarkullojnë lirshëm, ndërsa qarkullimi i mjeteve është penguar nga të dyja anët.
“Ne kemi ardhur nga puna dhe duam të shkojmë në shtëpi, por policia nuk na lejon”, u shpreh një banor për Ora News.
Ndërkohë nga ana e banorëve nuk ka rezistencë për shembjen e objekteve në këtë zonë.
“Po bëhet rrugë thjesht për të vjedhur 20 milion euro. Kemi protestuar çdo ditë por jemi të ndarë pasi ndaj nesh është hedhur gaz lotsjellës“, u shpreh një qytetar.
