Policia ka dhënë detaje të reja në lidhje me aksidentin ndodhur pasditen e kësaj të diele në Shkodër, ku një mjet i drejtuar nga një 27-vjeçare humbi kontrollin dhe u përplas me shtyllën elektrike.
Pas disa orësh, është nxjerrë nga mjeti drejtuesja dhe është dërguar në spital për të marrë ndihmë mjekësore.
“Në vijim të informacionit të dhënë pak më parë, për aksidentin e ndodhur në fshatin Zues, për një automjet që ishte përplasur me një shtyllë elektrike, në anë të rrugës, ju informojmë se shtetasja është nxjerrë nga automjeti nga zjarrfikësit dhe shërbimet e Policisë, dhe është transportuar në spital jashtë rrezikut për jetën”, njofton policia.
Kujtojmë se gjithashtu të lënduara kanë mbetur dy pasagjerë që ndodhen në spital, duke marrë ndihmë mjekësore.
Njoftimi i policisë:
Rreth orës 14:50, në fshatin Zues, shtetasja E. G., 27 vjeçe, ka humbur kontrollin mbi automjetin që drejtonte dhe si pasojë automjeti është përplasur me një shtyllë elektrike, në anë të rrugës. Nga përplasja, janë dëmtuar 27-vjeçarja dhe pasagjeret në automjet, shtetaset A. D., 21 vjeçe dhe B. G., 21 vjeçe.
Shërbimet e Policisë kanë shkuar menjëherë në vendin e aksidentit, ku vijon puna për nxjerrjen e drejtueses, nga automjeti i përplasur, me qëllim transportimin në spital. Ndërkaq, 2 pasagjeret janë në spital, në kujdesin e mjekëve dhe jashtë rrezikut për jetën.
Grupi hetimor po punon për sqarimin e rrethanave të aksidentit.
