Rreth 80% e punonjësve në administratën publike janë të vaksinuar për Covid 19. Kështu deklaroi sot Ministrja e Shëndetësisë dhe Mbrojtjes Sociale Ogerta Manastirliu, nga pika e vaksinimit në Stadiumin ‘Air Albania’ duke ju referuar inspektimeve të Inspektoriatit Shtetëror Shëndetësor. “Inspektoriati Shtetëror Shëndetësor në kuadër edhe të vendimit të Komitetit që në datë 4 të gjithë punonjësit e administratës publike, të shërbimeve duhet që të paraqesin kartën e vaksinimit, kartën e shërimit apo testin; ka bërë një verifikim në më shumë se 500 institucione shtetërore, deri më tani rreth 80% e punonjësve rezultojnë të vaksinuar.
Ne do ta vazhdojmë këtë inspektim padyshim, me të gjithë institucionet e tjera. Ndërkohë që gjithashtu edhe në supermarket apo në qendra tregtare ka vijuar inspektimi nga strukturat tona të Inspektoriatit Shtetëror Shëndetësor dhe rezultojnë rreth 70% deri më sot, deri me këto inspektime të kryera dhe janë rreth 120 struktura supermarketesh apo qendrash tregtare dhe struktura shërbimesh në tërësi që janë inspektuar në këto ditë pas daljes së vendimit”, deklaroi Manastirliu. Duke bërë apel për vaksinim dhe zbatim të masave anti-COVID, Manastirliu tha se situata po vlerësohet në mënyrë dinamike nga Komiteti Teknik i Ekspertëve.
“Komiteti Teknik i Ekspertëve është duke ndjekur në vazhdimësi situatën, duke e ndjekur në dinamikë atë, duke vlerësuar të gjithë indikatorët epidemiologjikë. Duke vlerësuar sigurisht edhe masat aktuale. Ndaj apeli është zbatimi i masave të cilat janë në fuqi dhe sigurisht më pas duke vlerësuar në mënyrë dinamike situatën epidemiologjike do të rivlerësojmë padyshim nëse do të ketë nevojë edhe masat aktuale që kemi”, tha Manastirliu. Aktualisht numri i të shtruarve është 150 por për çdo rast të përkeqësimit të situatës spitalet Covid 1, Covid 3 dhe Covid 4 dhe ato të rretheve janë në gatishmëri.
