Një shpërthim i fuqishëm ka ndodhur në zonën e aeroportit afër Lvivit. Sipas stacionit televiziv “Ukraine 24”, sot janë dëgjuar shpërthime në pjesë të ndryshme të Lvivit, qytet në perëndim të Ukrainës.
Në llogarinë e tij në Telegram, televizioni ka publikuar një video në të cilën shihet tym i zi në horizont të qytetit.
Gazetari ukrainas Ostap Yarysh, nga Zëri i Amerikës, ka thënë se ka dëgjuar disa shpërthime.
Fillimisht u raportua se sulmi kishte ndodhur në aeroport, por më pas Kryetari i qytetit të Lvivit, Andriy Sadovy, ka thënë në llogarinë e tij në Telegram se aeroporti nuk është goditur, por një ndërtesë afër tij.
“Definitivisht nuk është aeroporti”, ka shkruar ai. Nëse konfirmohet se ky ka qenë sulm rus, atëherë ai përbën sulmin më të afërt në qytetin historik të Lvivit, prej shpërthimit të luftës.
Rusia lëshoi gjashtë raketa drejt qytetit perëndimor të Lviv të premten në mëngjes, sipas forcave të armatosura të Ukrainës. Ka shumë të ngjarë që predha të ishin raketa lundrimi të lëshuara nga avionë luftarakë mbi Detin e Zi, thuhet në një deklaratë në Facebook.
Dy nga raketat u kapën nga sistemet e mbrojtjes ajrore, shtohet në deklaratë.
Kryetari i bashkisë së Lviv tha se raketat goditën një fabrikë riparimi avionësh pranë aeroportit. Puna në uzinë ishte ndalur përpara se të goditeshin raketat dhe nuk kishte raportime për viktima në këtë fazë, tha ai.
Një ekip i CNN në Lviv dëgjoi shpërthime të shumta rreth orës 6:30 të mëngjesit me kohën lokale dhe u pa tym që ngrihej nga drejtimi i aeroportit ndërkombëtar Danylo Halytskyi në perëndim të qytetit.
