Finalizohet operacioni policor i koduar “Meantime” në Sarandë, në kuadër të goditjes së veprimtarisë kriminale të shitjes së lëndëve narkotike.
Specialistët e Seksionit për Hetimin e Narkotikëve në Komisariatin e Policisë Sarandë arrestuan në flagrancë shtetasin A. M., 30 vjeç, banues në Sarandë, i cili dyshohet se shiste doza kanabisi.
I riu u kap teksa qarkullonte me automjet në qytet, ndërkohë që në mjet iu gjet një sasi lënde narkotike kanabis e ndarë në doza gati për shitje. Gjatë kontrollit në banesë, Policia gjeti dhe sekuestroi një sasi tjetër kanabisi, si dhe një peshore elektronike.
Në cilësinë e provës materiale u sekuestruan lënda narkotike, automjeti i të arrestuarit dhe peshorja elektronike.
Materialet procedurale i kaluan Prokurorisë për veprime të mëtejshme ligjore.
