Senati Akademik i Universitetit “Ismail Qemali”, Vlorë, nderon me titullin “Doctor Honoris Causa”, Prof. Dr. Alfred Jozeph Baldacchino, Rektorin e Universitetit “Sancti Syrilli” të Valletës në Maltë.
Më 09. 07. 2021, në Universitetin “Ismail Qemali”, Vlorë, në sallën “Rilindja”, u zhvillua ceremonia e nderimit të Prof. Dr. Alfred Jozeph Baldacchino, me titullin “Doctor Honoris Causa”. Të pranishëm në këtë ceremoni nderimi ishin pedagogë, studentë, qytetarë, miq dhe kolegë të Prof. Dr. Baldacchino. Nderuan me pjesëmarrjen e tyre edhe kryetari i Qarkut Vlorë Z. Ervis Moçka; kryetar i Dhomës së Tregtisë Vlorë Z.Arben Breshanaj, Z. Anduel Tahiraj dhe Znj. Vilma Bello deputete pranë Qarkut Vlorë.
Kryetari i Senatit Akademik dhe Rektori i Universitetit të Vlorës “Ismail Qemali” Prof. Dr. Roland Zisi përshëndeti ceremoninë duke theksuar kontributin e madh që Prof. Dr. Alfred Jozeph Baldacchino ka dhënë në forcmin e bashkepunimit midis dy universiteteve, duke e cilësuar atë një mik të Shqiptarëve dhe të Universitetit të Vlorës.
Konform protokollit të ceremonisë, u prezantuan dy oponencat e përgatitura me këtë rast, të cilat sollën të plotë jetën, karrierën, veprimtarinë dhe kontributet e Prof. Dr. Baldacchino, paraqitur prej Dr. Amali Cipi, Zv/Dekane e Fakultetit te Ekonomise dhe Prof. Ass. Fjoralba Vela, Drejtuese e Departamentit te Biznesit.
Ceremonia kulmoi me dhënjen e Diplomës së nderit “Doctor Honoris Causa”, Prof. Dr. Baldacchino, prej Kryetarit të Senatit Akademik dhe Rektorit të Universitetit “Ismail Qemali” Vlorë, Prof. Dr. Roland Zisi
Më tej Prof. Dr. Baldacchino në fjalën e tij përshëndetëse theksoi emocionin dhe nderin për marrjen e titullit “Doctor Honoris Causa”.
Gjithashtu ceremonia u përshëndet prej Prof. Francesco Favia nga Universiteti “Sancti Syrilli” Maltë, i cili përtej fjalëve të rastit theksoi edhe një herë vazhdimin e bashkëpunimit në të ardhmen ndërmjet dy insitucioneve tona.
