Policia Kriminale ka zhvilluar një operacion të madh antidrogë sot në Berat, me strukturat e Policisë atje, ku janë shoqëruar në total 105 persona. Prej tyre, 95 janë gra nga qytete të ndryshme të Shqipërisë dhe merreshin me qethjen e hashashit.
Gratë e moshave të ndryshme janë nga zona veriore, Shkodra, Laçi etj, dhe janë duke u marrë në pyetje, për të përcaktuar nëse ato strehoheshin në Berat apo transportoheshin çdo ditë për të punuar në fshatin Dronovicë.
Ndërkohë, është mësuar dhe emri i pronarit të serës dhe ai është Xhimi Dyli. Ky shtetas është duke u marrë në pyetje, pasi nuk mendohet se është i përfshirë në këtë aktivitete kriminal, por e kishte dhënë atë me qira.
Sera ishte marrë me qira dhe gratë që punonin në hashash, dyshohet se flinin prej muajsh brenda saj me një sipërfaqe rreth 2 hektarësh, ku ishin përshtatur edhe ambiente fjetjeje me dyshek me ajër dhe dushe për t’u larë. Megjithatë, hetimi do të përcaktojë detaje të tjera.
Numri i bimëve të kultivuara është me mijëra, thanë burimet, por Policia e Shtetit ende nuk ka dhënë informacion zyrtar mbi sasinë e lëndës narkotike dhe personat e arrestuar. Këtë mbrëmje mësohet se aty janë arrestuar në kushtet e flagrancës dhe 9 roje të armatosur që ruanin serat.
Ndërkohë, në kërkim janë shpallur personat që dyshohet se qëndrojnë në krye të kësaj veprimtarie kriminale. Drejtori i Policisë Kriminale Neritan Nallbati, kishte paralajmëruar sot një konferencë për mediat por është shtyrë për nesër.
