Tirana-Crvena Zvezda nuk ka fund. Tanimë në Serbi pjesë të provokimeve përpara ndeshjes shtojnë edhe një këngë të Bimmbimma dhe Nush. Dy reperat publikuan një ditë para ndeshjes këngën “Besa Besë” dhe aty ata shfaqen duke bërë simbolin e shqiponjës.
Nuk mungon as flamuri me logon e UÇK-së, mesazhet “Kosova është Shqipëri” dhe “Shtetet e Bashkuara të Shqipërisë”, si dhe një ofendim për Serbinë. Gjithsesi lidhja me ndeshjen është zero. Në klip shfaqet edhe Taulant Xhaka duke bërë shqiponjën, që në Serbi e cilësojnë simbol të Shqipërisë së Madhe. Sigurisht, emri i tij lidhet menjëherë me Granitin, i cili i shënoi Serbisë dhe festoi njëlloj në ndeshjen e Kupës së Botës në Rusi.
“Mondo.rs” në artikull e cilësojnë këngën e publikuar pjesë të incidenteve para ndeshjes, ndërkohë që nuk u ka dalë ende inati i mesazhit të Capital Crew (Lufta e shqiptarit ka burrëri, ne nuk merremi me gra dhe fëmijë”) apo “Luleshtrydhja” e prerë nga Fanatics.
