Dy persona kanë përfunduar pas hekurave, pasi akuzohen për shitje të lëndëve narkotike. Burime zyrtare nga policia bënë me dije se u arrestuan shtetasit me inicialet S. K., 20 vjeç dhe A. U., 22 vjeç, të dy banues në Kavajë.
NJOFTIMI I POLICISE
Vijon megaoperacioni policor antidrogë i koduar “Tempulli”, kundër veprimtarive kriminale të prodhimit dhe të shitjes së lëndëve narkotike, në zona kryesisht me frekuentim të lartë nga të rinjtë.
Vihen në pranga 2 shtetas që shitnin doza cannabisi, në lagje të ndryshme të Kavajës, si dhe mbanin armë të ftohta. Sekuestrohen një sasi lënde narkotike cannabis sativa, e ndarë në disa doza të gatshme për shitje, automjeti që përdornin të arrestuarit, për shpërndarjen, si dhe 2 shkopinj bejsbolli. Në vijim të punës së përditshme të Policisë, kundër veprimtarisë kriminale të shitjes së lëndëve narkotike, punë e cila kryhet në kuadër të megaoperacionit “Tempulli” dhe me mbështetjen e informacioneve nga inteligjenca policore, shërbimet e Forcës së Posaçme “Shqiponja” të DVP Durrës, në bashkëpunim me shërbimet e Komisariatit të Policisë Kavajë, goditën një tjetër rast të shitjes së dozave të lëndës narkotike cannabis sativa, në lagje të ndryshme të këtij qyteti.
Për këtë rast u vunë në pranga shtetasit S. K., 20 vjeç dhe A. U., 22 vjeç, të dy banues në Kavajë. Këta shtetas u kapën në flagrancë, teksa lëviznin me automjet, në Qerret, me një sasi lënde narkotike cannabis sativa, të ndarë në disa doza, me qëllim shitjen. Dozat u sekuestruan në cilësinë e provës materiale, bashkë me automjetin dhe me 2 armë të ftohta (shkopinj bejsbolli) që u gjetën në brendësi të këtij automjeti. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
