Një 24-vjeçar është arrestuar nga policia si shkaktari i zjarr rënies në pikën e karburantit në afërsi të Kombinatit mbrëmjen e kaluar. Shtetasi me inicialet M.B, duke drejtuar një motoçikletë pa patentë, është përplasur me bombolën e gazit të karburantit e cila ka shkaktuar më pas edhe flakët gjigante të cilat alarmuan banorët.
Bombola shërbente për furnizimin me gaz të automjeteve dhe përplasja ka shkaktuar rrjedhje të saj dhe më pas djegien e gjithë pikës së karburantit. I riu u largua nga vendi i ngjarjes, ndërsa është identifikuar dhe arrestuar më pas nga efektivët e komisariatit nr.6. 24-vjeçari akuzohet për veprat penale “Shkatërrim i pronës”, “Largim nga vendi i aksidentit” dhe “Drejtim i automjeteve në mënyrë të parregullt”.
