Në javën e 7-të të Kategorisë Superiore ishte dita e skuadrave udhëtuese. Tri fitore në udhëtim dhe vetëm Apolonia arriti të merrte tri pikët në shtëpinë e vetë teksa mposhti 1-0 Skënderbeun duke siguruar fitoren e parë.
Fitore të thjeshtë me goelada për Vllazninë dhe Kukësin që u konfirmuan si dy skuadrat e momentit në kryesore dhe me meritë ndajnë mes tyre vendin e parë dhe të dytë, ndërkohë që pas 5 ndeshjesh në krye të Tiranës mori fitoren e parë Nevil Dede, me bardheblutë që u rikthyen te suksesi që pas atij triumfi ndaj Kukësit në javën e parë, teksa triumfuan 0-1 në një fushë të vështirë si ajo e Laçit.
Vllaznia u konfirmua edhe njëherë tjetër se këtë sezon do të luftojë për objektiva madhorë, pasi ruajti vendin e parë në kuotën e 16 pikëve pas javës së 7-të, teksa arriti të fitonte në mënyrë spektakolare ndaj Kastriotit në Kamëz me shifrat 0-3, një fitore e thellë ndaj një ekipi që nuk kishte humbur më parë në këtë sezon.
Vllaznia e gjeti epërsinë pas vetëm disa sekondash me Dungan, ndërkohë që në të 18-ën Dilaver dyfishoi shifrat. Në fundin e pjesës së parë erdhi edhe goli i Besir Demirit që vulosi suksesin e shkodranëve. Shumë të thjeshtë e pati edhe Kukësi i Gegës në transfertën ballshiote ndaj Bylisit ku siguroi fitoren e 4-t radhazi në kampionat dhe u ngjit përkohësisht në vendin e 2-të me 13 pikë. Eze zhbllokoi shifrat pas vetëm 2 minutash lojë, ndërkohë që Ibraimi me një gol fluturimthi në pjesën e parë i çoi shifrat në 0-2.
Pak para fundit shënoi edhe Vesel Limaj me 11-metërsh. Laçi pa trajner në stol me Stavri Nicën që nuk ishte i pranishëm në stadium u thye nga një supergol i Idi Bathës, që erdhi fill disa sekonda pasi Laçi kishte shpërdoruar një 11-metërsh me Nëabuzen për një prekje të topit me dorë nga Vangjeli brenda zone, me topin që u dërgua në këndore nga Visar Bekaj. Mori fitoren e parë në kampionat Apolonia që iu largua vendit të fundit falë suksesit 1-0 ndaj Skënderbeut në Loni Papuçiu, një fitore që erdhi me një gol të realizuar nga Gjata me penallti në minutën e 79-të.
