Pronari i një televizioni lokal në Gjirokastër është shpallur person non-grata nga shteti grek.
Lajmin e bën të ditur Unioni i Gazetarëve Shqiptarë, duke sqaruar se “autoritetet greke ne piken kufitare te Kakavijës, përmes një dokumentacioni zyrtar kane shpallur si te padëshirueshëm për ne territorin e Republikës se Greqisë pronarin dhe drejtuesin e RTV Alpo ne Gjirokastër, zotin Aristotel Petro”.
Mësohet se në shkresën formale që i është dorëzuar z. Petro, nuk jepen shpjegime për arsyen e këtij vendimi.
“Nuk ka asnjë shpjegim për motivet qe justifikojnë një vendim te tille refuzues nga shteti fqinj. Pas njoftimit te sotëm, zyra qendrore dhe drejtues te Unionit te Gazetareve Shqiptare po interesohen për arsyen konkrete te këtij vendimi, i cili ka te beje me një nder mediat private me te rëndësishme te rajonit jugor te vendit”,thuhet në reagimin e UGSH.
Sipas UGSH është shqetësues ky vendim i palës greke, pasi përben një akt te rralle privimi për lëvizje te lire, te një përfaqësuesi te medias ne rajonin kufitar mes Shqipërisë dhe Greqisë dhe fatkeqësisht, shton numrin e gazetareve shqiptare që shpallen te padëshirueshëm nga autoritetet zyrtare greke.
