Prokuroria e Posaçme, SPAK ka kërkuar riekspektim për shpërthimin e fuqishëm që ndodhi pak muaj më parë në një biznes në Lushnje, ku humbën jetën babë e bir dhe u plagosën disa të tjerë, mes tyre dhe deputeti i PS-së Bujar Çela.
Riekspertimi, sipas burimeve të gazetares Klodiana Lala do të bëhet për të parë nëse ka patur shkelje të rregullave të sigurisë në punë.
Shpërthimi i fuqishëm ndodhi më 1 mars të këtij viti në Lushnje ku si pasojë mbetën të vrarë babë e bir, Roland dhe Elidon Hoxha.
Gjithçka ndodhi teksa një vinç, ku ndodheshin dy viktimat Roland dhe Elidon Hoxha, po ngrinte një bombol oksigjeni që do të përdorej në lartësi për të kryer saldime, maja e mjetit të hekurt ka hasur në telin përcjellës të tensionit të lartë e për pasojë bombola ka shpërthyer.
Babai ka ndërruar jetë në vinç, ndërsa i biri u transportua me ambulancë në drejtim të Tiranës, por fatkeqësisht rrugës ka ndërruar jetë.
