Ditën e sotme është përcaktuar edhe ndeshja e radhës miqësore për Shqipërinë. Kombëtarja do të zbresë në fushë për herë të parë në vitin 2020, më datë 30 mars. Kuqezinjtë do të luajnë në Udine të Italisë dhe përballë do të kenë Slloveninë. Federata Shqiptare ka gjetur akordin dhe në këtë formë ndeshja do zhvillohet në orën 20:45 në “Dacia Arena”, në një nga impiantet më modernë të Italisë, aty luan skuadra e Udinezes. Një kundërshtar i denjë për të matur forcat, teksa skuadra dhe trajneri Edi Reja do të përgatiten për ndeshjet zyrtare.
Kështu, italiani do të ketë një mundësi për të testuar futbollistë të ndryshëm, por edhe për të njohur gjendjen fizike të titullarëve. Ndërkohë, në njoftimin e FSHF bëhet e ditur se detajet për biletat dhe pikën e shitjes së tyre do të komunikohet sërish në ditët në vijim, ndërsa pritet një interesim i madh duke marrë parasysh edhe numrin e shqiptarëve në Itali.
