Në konferencën që pati sot me gazetarët në kryeministri, kreu i qeverisë Edi Rama duket se dha një lajm të pakonfirmuar, siç ishte ai për një shqiptar të vrarë në Ukrainë. Rama tha se këtë lajm e kishte mësuar nga mediat, por në fakt duket se informacionin e ka pasur të pasaktë.
Emanuel Bazanji, një shqiptar i cili ndodhet në Ukrainë dhe vullnetarisht i është bashkuar ushtrisë së Ukrainës dhe është pozicionuar në mbrojtje të Kievit ka treguar në lidhje me situatën në Ukrainë.
Gazetari i TCH Muhamed Veliu ka mundur të ketë një komunikim të shkurtër me shqiptarin i cili ka thënë fillimisht “Mirë jam, gjallë”.
Më tej Emanueli ka shkruar: “U bombarduam sot me aviacion dhe helikopter”, ndërsa ka theksuar se situata është e rrezikshme. Emanueli ka thënë ndër të tjera se i duhet të fikë telefonin e tij, pasi sistemi GPS i celularit të tij mund të shërbejë për rusët në identifikimin e vendndodhjes. “Mirë jam. Gjallë…. “, është përgjigja e tij. Më tej Emanueli tregon se çfarë është duke ndodhur në repartin ushtarak ku ai shërben si pjesë e legjionit Gjeorgjian.
