Çmimet e apartamenteve vazhdojnë të rriten pavarësisht numrit të lartë të lejeve të ndërtimit. Banka e Shqipërisë raporton se në vitin e shkuar bankat dhanë më shumë kredi për blerje të pasurive të paluajtshme duke mbuluar 50 për qind të totalit, por po ashtu dhe normat e interesit pësuan rënie. Megjithatë në dokumentin vjetor të institucionit qendror financiar thuhet se blerjet e banesave kanë qenë kryesisht nga vendasit dhe u regjistrua një rënie e lehtë nga jo rezidentët.
Rreth 18% të banesave janë raportuar të blera nga shtetas jorezidentë. Nga këta, rreth 77% rezultojnë shtetas të vendeve të BE-së. “Vrojtimi tregon se Indeksi i çmimit të banesave në rang vendi u rrit me 23.6% në terma gjashtëmujorë, dhe me 44.5% ndaj një viti më parë. Rritja e vlerës së indeksit për Tiranën ishte gjithashtu e forte”, thuhet në raport.
Trendi parashikohet të jetë i njëjtë edhe për sa i përket vitit 2025. Banka e Shqipërisë saktëson se ka vazhduar të bjerë numri i pronave të pa shitura. Madje koha e shitjes nga momenti i daljes së pasurisë në treg vijon të bjerë duke shkuar në mesataren 9 muaj nga 10 që ka qenë më parë ndërsa në Tiranë në 7.1 nga 9.7 që ishte në studimin e mëparshëm. Po ashtu, edhe çmimet e qirasë janë rritur. Agjentët madje shtojnë se situata do vijojë e tillë në një periudhë afatgjatë.
