Situata alarmante e krijuar nga Koronavirusi ka prekur edhe Botërorin e Formula 1. Drejtuesit e këtij kampionati kanë ngritur dyshimet në lidhje me zhvillimin e Çmimit të Madh të Kinës në pistën e Shanghait, më 19 prill të këtij viti.
Për këtë arsye, ditën e mërkurë, Grupi Strategjik i Formula 1 do të mblidhet për të diskutuar situatën e për të marrë më pas ndonjë vendim sa i përket zhvillimit ose jo të kësaj gare. Javën e kaluar Formula E bëri të ditur anulimin e garës në ishullin kinez Sanya, e parashikuar të mbahej në muajin mars, dhe tani këtë rrezik e ka edhe gara e Formula 1. Drejtuesi i Red Bullit, Christian Horner, tha për Reuters se shfaq besimin më të madh në vendimet e organeve drejtuese të këtij sporti, duke shtuar se situata po vëzhgohet me vëmendje.
Ndërkaq, nuk do të ketë një shkëmbim datash mes Çmimit të Madh të Kinës me atë të Rusisë, me këtë të fundit që në kalendar është parashikuar të zhvillohet në 27 shtator. Një zëdhënës i Komitetit Organizativ rus ka konfirmuar gjithçka për “Autosport”, duke theksuar se nuk do të ketë ndryshime datash në program.
