Gazetari Bledi Mane, përmes një postimi në facebook, ka bërë publik një rast flagrant të personave të infektuar me Covid, të cilët zgjedhin të mos karantinohen, por vijojnë punën normalisht duke qenë burim infeksioni dhe për persona të tjerë të shëndetshëm. Rasti në fjalë nuk ka të bëjë me një individ të zakonshëm dhe të papërgjegjshëm, por me një drejtues institucioni lokal.
Shefi i komisariatit të Përmetit, Petrit Gjokoza, prej 6 ditësh i infektuar me Covid zgjedh të kurohet jo në spital, por në zyrën e tij në komisariatin e Policisë sipas gazetarit. Madje Mane thekson se ai ka infektuar dhe persona të tjerë në polici. Kjo situatë vazhdoi deri kur gjendja e kryepolicit u perkeqësua dhe iu desh të transportohej në spitalin Infektiv në Tiranë.
Postimi i plotë: E frikshme në Përmet/ 6 DITË RRESHT SHEFI I POLICISË KUROHEJ NË KOMISARIAT DERISA RREZIKOI JETËN
I erdhi përgjigja e tamponit, rezultoi pozitiv me Covid-19 qysh prej së martës së kaluar dhe shefi i komisariatit Përmet, mirditori Petrit Gjokaza në shkelje flagrante me çdo protokoll pandemie nuk u shtrua në spital, nuk qëndroi i izoluar në banesë por trajtohej me serume dhe antibiotikë të ndryshëm në zyrën e tij duke infektuar edhe policë të tjerë. Me urdhërin politik të deputetes së Qarkut Mirela Kumbaro dhe kryetarit të Partisë Socialiste Edvin Tuçi, spitali i Përmetit që ka mbyllur dyert e tij për pacientët lokalë, dërgonte çdo ditë një mjek dhe një infermier të pakualifikuar për tu kujdesur për kryepolicin e infektuar me Covid.
Kjo masakër çnjerëzore vazhdoi deri mbrëmë kur niveli i oksigjenit të pacientit ra në kuotat jetike dhe me urgjencë e nisën drejt Spitalit Infektiv në Tiranë. Gjendja e pacientit mbetet serioze por injoranca lokale e nakatosur me fodullëkun politik tingëllon më e rezikshme se çdo infeksion. Shërim të shpejtë kryepolicit dhe le të shërbejë ky lajm i dhimbshëm nisje hetimesh nga Shërbimi i Ankesave dhe Çështjeve të Brendshme pranë Policisë së Shtetit!
