Një grup të rinjsh, pjesë e “Smile Albania”, u trajnuan sot në ambientet e Konsullatës Italiane në Vlorë për të përcjellë me standard dhe saktësi te vizitorët atraksionet që nuk duhen humbur qofshin ato kulturore apo natyrore.
Drejtoria Rajonale e Kulturës Kombëtare i është bashkuar trajnimit të stafit të “Smile Albania” në bashkëpunim me Administratën e Zonave të Mbrojtura Vlorë ku të rinjtë e “Smile Albania” u njohën dhe u trajnuan mbi: parqet arkeologjike, Qendrat Historike dhe sitet kryesore të trashëgimisë kulturore në qarkun Vlorë, oraret e vizitave dhe aksesibilitetin në monumente te kulturës; kalendarin e aktiviteteve kryesore gjatë sezonit turistik veror.
Po ashtu, ata u trajnuan për kontaktet e nevojshme për guida apo informacione më të detajuara sipas kërkesave të vizitorëve, shtigjet mjedisore në Zonat e Mbrojtura, pikat e biletarisë dhe tarifat dhe projektet kulturore dhe mjedisore në proces, etj.
Projekti “Smile Albania” që po zbatohet për vitin e dytë në vendin tonë ka bërë që natyra shqiptare të “buzëqesh” në mbarë botën. Të rinjtë, pjesë e “Smile Albania”, janë ata më të përgatiturit në njohjen e historisë, kulturës dhe natyrës shqiptare. Ata prezantojnë vendin tonë te vizitorët e huaj me më të mirën shqiptare, por njëkohësisht ata kujdesen dhe mbrojnë mjediset publike dhe natyrën nga ndotësit e saj, nga shkelësit e ligjit apo dhe duke ndihmuar ata që kanë nevojë për të.
