“Spitalet, qendrat shëndetësore, shkollat duhet t’i ndërtojmë të gjitha brenda 9-mujorit të vitit 2020”, deklaroi sot Kryeministri Edi Rama. Në mbledhjen e Komitetit Kombëtar të Rindërtimit, Kryeministri theksoi se “viti i ri shkollor, për fëmijët që kanë humbur shkollën për shkak të rrënimit nga tërmeti, duhet të nisë në shkolla të reja shumë më të mira se ato që kishin”.
Për lagjet e reja, Rama tha se “ambicia është që brenda 6-mujorit të parë t’i kemi në kantier”. “Kjo do të kërkoj natyrisht më shumë kohë, pasi bëhet fjalë për ndërhyrje masive, por objektivi është që deri në fund të vitit 2021 të kenë filluar në pjesën më të madhe akomodimet e banorëve që sot janë me qira në zonat urbane”, tha Rama.
