Disi i çliruar por konfuz.Kështu u shfaq ish-ministri i Brendshëm, Saimir Tahiri, jashtë gjykatës së Krimeve të Rënda e cila e dënoi me 5 vjet burg për shpërdorim detyre por që do ti konvertohet me 3 vjet shërbim prove për shkak të gjykimit të shkurtuar.
Tahiri e cilësoi një vendim absurd, duke u shprehur se u katandis kokoshi në një thellë. Sakaq ai u shpreh i vendosur për ta apeluar vendimin.
Tahiri: Më lini të përtyp se nuk di t’ju them më shumë. Isha më i qartë kur hyra sesa tani kur dola. Më duhet ta kuptoj të gjithën. Është si të shkosh në një provim që mësuesja të thotë ke mësuar shumë mirë por hajt se po të vë një 5. Më thanë se nuk je trafikant po meqë i ke kushërinj ke shpërdoruar detyrën. Si t’ja bëj unë, duhet të mbajmë përgjegjësi për të gjithë kushërinjtë idotë. Për dy vite keni ndjekur procesin e shekullit. U katandis kokoshi në një thelë.
I lodhur nga një seancë maratonë, Tahiri njoftoi gazetarët se do të ketë një komunikim me ta ditën e nesërme, teksa pati një porosi: Ruani veten nga kushërinjtë!
Tahiri: Nesër është një ditë tjetër për të komunikuar bashkë. Më thanë që ke ca kushërinj që kanë emrin tënd kështu që ruani veten nga kushërinjtë.
