Kur të shkon mendja për një këngëtar, gjithmonë mendon njëkohësisht se sa shumë paguhet ai dhe se sa të larta janë të ardhurat e tij, por jo gjithmonë kjo gjë qenka e vërtetë. Këtë na e ka treguar vetë këngëtari i njohur Xhavid Dedej, i cili ka qenë i ftuar këtë të mërkurë në emisionin “Soirée” me Jonida Shehun në Top Channel.
Të gjithë e kanë dëgjuar të paktën njëherë në jetën këngën e Xhavid Dedej me Pandorën që titullohet “Bobi”. Në atë periudhë që u lançua ka qenë një ndër këngët më të dëgjuara dhe më të komentuara, por vlen të theksojmë se ende sot ajo dëgjohet. Ai është pyetur se sa lekë fiton nga muzika që bën dhe Xhavid Dedej ka treguar se fiton mjaftueshëm.
“Të them të drejtën fare, mendoj fundin e muajit, i paguaj dritat, s’i paguaj. Se kur ulemi ne në tavolinë, thonë ‘o ky ka qenë në dasmë, ka lekë’ edhe paguajmë ne. Por kur vjen fundi i muajit ikin ato. Ne nuk jemi këngëtarë të famës, ne jemi këngëtarë që bëjmë punën, jemi këngëtarë të popullit”- është shprehur Xhavid Dedej.
