Protesta e aktivistëve dhe artistëve të Teatrit Kombëtar ka përfunduar pak minuta më parë, pas më shumë se dy orësh. E nisur në orën 16.30, protesta ku morën pjesë politikanë, aktivistë të shoqërisë civile, qytetarë dhe aktorë të Teatrit Kombëtar ka vijuar dhe ka përfunduar e qetë dhe pa tensione përveç disa rasteve sporadike. 49 vjeçari Arben Qyrani ka qenë personi që ka hedhur shashka mes protestuesve ku u plagosën lehtë një gazetare dhe një person tjetër.
Ky shtetas i ndihmuar dhe nga persona të tjerë ka tentuar disa herë të nxisë konflikt në protestë por është larguar nga disa aktivistë të Aleancës. Ndërkohë, menjëherë pas përfundimit të protestës Policia e shtetit ka njoftuar se ka ndaluar shtetasin e mësipërm.
Siç shihet nga pamjet e mëposhtme, të bëra me dron, në protestën për Teatrin ka pasur numër të konsiderueshëm qytetarësh. Skena ka qenë e gjitha e aktivistëve dhe aktorëve të Teatrit. Kreu i PD Lulzim Basha, kryetarja e LSI Monika Kryemadhi e politikanë të tjerë nuk kanë folur pasi axhenda ishte përcaktuar nga vetë aktorët.
