Tetë persona humbën jetën nga zjarri që përfshiu një ndërtesë në jugperëndim të Parisit, raporton Shërbimi Zjarrfikës i kryeqytetit francez.
Ndërkohë 30 persona të tjerë, mes tyre dhe tre zjarrfikës, mbeten të plagosur. Një prej tyre mësohet se është në gjendje të rëndë.
“Numri mund të rritet ende, sepse zjarri është ende në zhvillim në katin e 7 dhe 8 të ndërtesës tetë katëshe”, tha një zëdhënës i shërbimit zjarrfikës për agjencinë e lajmeve AFP.
Nuk është e qartë se çfarë e shkaktoi zjarrin në njësinë 16 në Paris.
Policia ka arrestuar një femër, si person i dyshuar për zjarrin. Prokurori i Parisit, Remi Heitz, thotë se zjarri mund të ketë qenë i qëllimshëm.
Zjarri u përhap në dy katet e ndërtesës së viteve 1970 të hënën gjatë natës, duke detyruar disa banorë të hidhen në çatitë më të afërtat për t’i shpëtuar flakëve dhe tymit.
200 zjarrfikës u erdhën në ndihmë, duke ndihmuar ata që kishin mbetur mbi çati.
Rreth 30 persona u evakuan me shkallë.
“Kur arritëm, ne u ballafaquam me një situatë apokaliptike. Shumë njerëz po bënin thirrje për ndihmë nga dritaret”, tha zëdhënësi i shërbimit zjarrfikës.
Ndërtesat përreth në zonën luksoze jo shumë larg Kullës Eifel janë evakuar si masë paraprake.