Gjykata e Apelit ka lënë të lirë ditën e sotme, administratorin e ‘Skela Syla’, Petrit Sylën, i cili ishte vënë në pranga me akuzën shkeljeve të rregullave të sigurisë në punë.
Syla u la në burg nga Gjykata e Shkallës së Parë, për ngjarjen e rëndë të ndodhur më 16 gusht, ku humbën jetën dy punëtorë pas rrëzimit të skelës në një pallat në Tiranë.
Ishte avokati i biznesmenit Syla, Mirash Ndoci që apeloi vendimin, duke kërkuar lirimin e tij në Gjykatën e Apelit, pasi përgjegjësia për ngjarjen e ndodhur në një pallat te rruga e Elbasanit nuk binte mbi të.
Për këtë ngjarje, është në burg inxhinieri i kompanisë “Skela Syla”, Ilir Bendo, ndërsa në “arrest shtëpie” Xhimi Tarushi, drejtuesi teknik i punimeve për subjektin ndërtues.
